کراچی (اسٹاف رپورٹر)پاکستان ہاکی فیڈریشن (پی ایچ ایف)نے سینئر ٹیم کی مینجمنٹ کا اعلان کردیا، اولمپیئن خواجہ جنید کو ہیڈ کوچ اور منیجر مقرر کیاگیاہے۔اس کے علاوہ سمیر حسین کوچ جبکہ اولمپئن وسیم احمد اور اجمل خان اسسٹنٹ کوچز تعینات کردیا گیا۔نومنتخب ہیڈ کوچ خواجہ جنید کا پہلا ٹاسک اولمپک کوالیفائنگ راونڈ کیلئے ٹیم تیار کرنا ہے۔ نئی ٹیم انتظامیہ کو دو ایونٹس کے لیے فی الحال ذمہ داریاں سونپی جارہی ہیں۔ جن میں ٹوکیو اولمپکس کوالیفائنگ راونڈ اور ساوتھ ایشین گیمز شامل ہیں۔ اولمپکس کوالیفائنگ راونڈ ستمبر اکتوبر میں کھیلا جائے گا۔انٹرنیشنل ہاکی فیڈریشن نے ابھی اس کا وینو اور تاریخیں کنفرم نہیں کیں جب کہ ساوتھ ایشین گیمز یکم دسمبر سے نیپال کے شہر کھٹمنڈو میں ہورہی ہیں۔ ان دونوں ایونٹس میں پرفارمنس کے بعد ٹیم انتظامیہ کے مستقبل کا دوبارہ جایزہ لیا جاے گا۔
