کراچی(اسٹاف رپورٹر) پاکستان ایشین انڈر۔ 23 والی بال چیمپئن شپ کے کوارٹر فائنل میں پہنچ گیا۔ پاکستان کل سری لنکا اور 8 اگست کو آسٹریلیا کے خلاف کھیلے گا۔ میانمار میں ایشین انڈر۔23 والی بال چیمپئن شپ میں پاکستان نے اپنے گروپ کا تیسرے اور آخری میچ میں تائیوان کو 1-3 سے ہرا دیا۔ پاکستان کو پہلے سیٹ میں تائیوان کے ہاتھوں 25-20 سے شکست کا سامنا کرنا پڑا۔ دوسرے سیٹ میں پاکستان نے 25-18 سے کامیابی حاصل کرکے مقابلہ 1-1 سے جیت لیا جبکہ تیسرے سیٹ 18-25 سے اور چوتھے سیٹ میں بھی 25-15 سے ہرا کر میچ 3-1 سے جیت لیا، پاکستان نے اپنے پہلے میچ میں قطر کو 3-0 سے، دوسرے میچ میں بحرین کے خلاف 3-0 سے جبکہ تیسرے اور لیگ کے آخری میچ میں تائیوان کو 3-1 سے شکست دے کر اپنے گروپ میں ٹاپ پوزیشن حاصل کرکے کوارٹر فائنل کے لئے کوالیفائی کیا ، چیمپئن شپ میں 16 ٹیمیں حصہ لے رہی ہیں جن کو 4 گروپ میں تقسیم کیا گیا ہے ۔ گروپ اے میں میزبان میانمار، سری لنکا، آسٹریلیا اور ہانگ کانگ،گروپ بی میں جاپان، قازقستان، سعودی عرب اور ویت نام، گروپ سی میں تائیوان، پاکستان ، قطر اور بحرین جبکہ گروپ ڈی میں تھائی لینڈ، چین، بھارت اور نیوزی لینڈ شامل ہیں۔
