کراچی(اسٹاف رپورٹر)انٹر نیشنل ہاکی فیڈریشن (آئی ایچ ایف)کی جانب سے عائد جرمانے کی پہلی قسط جمع کرانے کے لیے سندھ حکومت نے پاکستان ہاکی فیڈریشن کو ڈھائی کروڑ روپے کی گرانٹ جاری کردی۔ذرائع کے مطابق سندھ حکومت نے پاکستان ہاکی فیڈریشن کو 10کروڑ روپے کی گرانٹ کی منظوری دی ہے ۔پاکستان ہاکی فیڈریشن مالی مشکلات سے دوچار ہے ، پی ایچ ایف کے اکائونٹ میں گزشتہ ماہ صرف تین ہزارروپے تھے۔ذرائع کے مطابق جرمانہ جمع کرانے کی آخری تاریخ 19اگست ہے، پی ایچ ایف کو جرمانے کی پہلی قسط کی مد میں تقریبا 9ہزار یورو جمع کرانے ہیں۔پاکستان ہاکی فیڈریشن کے صدر خالد سجاد کھوکھر اور سیکرٹری آصف باجوہ نے تین ہفتے قبل وزیر اعلی سندھ مراد علی شاہ سے ملاقات کرکے دس کروڑ روپے کی گرانٹ منظور کرائی تھی جس کی چار قسطوں میں ادائیگی کی جائے گی ۔سندھ حکومت ماضی میں بھی ہاکی فیڈریشن کو دس کروڑ روپے کی گرانٹ دے چکا ہے ۔
