کوہاٹ (جسارت نیوز)کوہاٹ میںآل پاکستان رمضان نائٹ گالا کرکٹ ٹورنامنٹ کا اختتام ہوگیا ۔ ٹورنامنٹ میں مختلف اضلاع کی 130 ٹیموں نے حصہ لیا۔ فائنل میچ جان برادرز سی سی اور پی ٹی آئی ا سٹار کوہاٹ کے مابین کھیلا گیا جسے سنسنی خیز مقابلے کے بعد جان برادرز سی سی نے اپنے نام کرلیا۔ فائنل میچ کے مہمان خصوصی مشیر تعلیم خیبرپختونخوا ضیاء اللہ خان بنگش جبکہ ڈپٹی کمشنر کوہاٹ مطیع اللہ گیسٹ آف آنر تھے۔ اس موقع پر پی ٹی آئی رہنما شفیع اللہ ،ملک عاطف اور شائقین کرکٹ کی ایک بڑی تعداد موجود تھی۔ مشیر تعلیم نے خطاب کرتے ہوئے کہا کہ کھیل نوجوان نسل کی صلاحیتوں کے اظہار کا ایک بہترین ذریعہ ہے جس سے جسمانی و ذہنی صلاحیتوں میں نکھار آتا ہے۔ انہوں نے کہا کہ صوبائی حکومت نوجوانوںکوکھیلوں کی بہترین سہولیات کی فراہمی کیلئے سرگرم عمل ہے۔ ٹورنامنٹ آرگنائزر مطیع اللہ بنگش نے ٹورنامنٹ کے بہتر انعقاد میں تعاون کرنے پر ضلعی انتظامیہ، پولیس، ٹریفک وارڈن ، سٹاف ، پرنٹ ، الیکٹرانک ، سوشل میڈیا اور شائقین کا شکریہ ادا کیا۔
