ٹھٹھہ (نمائندہ جسارت) ٹھٹھہ میں پولیس اور حساس اداروں کی تین بڑی کارروائیاں، مشکوک چینی باشندے، ڈاکو سمیت 8 لوگوں کو گرفتار کرلیا، چائنیز لی ڈونگیون دو ساتھیوں سمیت مشکوک سرگرمیوں میں گرفتار ہوئے۔ ٹھٹھہ کے ساحلی علاقے کیٹی بندر میں خفیہ اداروں نے مشکوک سرگرمیوں میں ملوث تین مشکوک لوگوں کو حراست میں لے لیا، جن میں ایک چینی باشندہ جس کے قبضے سے انتہائی خفیہ دستاویزات برآمد کرلی گئی ہیں۔ لی ڈونگیو کے ساتھ شیخ محمود، محمد الطاف نامی مشکوک افراد بھی زیر حراست ہیں۔ مزید تفتیش کے لیے جے آئی ٹی تشکیل دے دی گئی۔ دوسری طرف میرپور ساکرو پولیس نے دوران مقابلہ ایک ڈاکو صدیق ماچھی کو گرفتار کرلیا، گرفتار ڈاکو کے قبضے سے ایک ماہ قبل چوری شدہ بائیک، ایک کلو چرس اور ایک عدد رپیٹر برآمد کرلیا، ایک اشتہاری رحیم کنہار، منشیات فروش اعجاز چانگ، سرور بروہی کو بھی گرفتار کرلیا گیا۔
