کوئٹہ میں نیا پاکستان ہائوسنگ اسکیم، وزیراعظم آج قرعہ اندازی کرینگے

اسلام آباد(صباح نیوز)کوئٹہ میں نیا پاکستان ہائوسنگ کے تحت کچلاک میں نئی رہائشی اسکیم کا پی سی ون تیار ہوگیا، وزیراعظم عمران خان آج (پیر کو) اسلام آباد میں قرعہ اندازی کریں گے۔ فارم جمع کرانے والوں کو تاحال مکان یا فلیٹ کی لاگت اور اقساط کی ادائیگی کا طریقہ کار واضح نہیں
وزیراعظم عمران خان نے 21 اپریل کو کوئٹہ کے نواحی علاقے کچلاک میں نئے رہائشی منصوبے کا سنگ بنیاد رکھا تھا جس میں ذاتی گھر کے خواہش مند سرکاری ملازمین اور مختلف شعبہ زندگی تعلق رکھنے والے 7 ہزار684 افراد نے فارم جمع کرائے۔ کچلاک میں 600 فلیٹس اور 750 گھر بنائے جانے ہیں۔ پی ایچ اے حکام کا کہنا ہے کہ جلد رہائشی منصوبے کی تعمیر کا کام شروع کر دیا جائے گا۔ کوئٹہ کی وحدت کالونی کی جگہ سستے مکانات بنانے کا منصوبہ ترک کر دیا گیا ہے جس کی جگہ سبی روڈ پر درخشان کے مقام پر سستا رہائشی منصوبہ بنایا جائے گا۔