لارڈز (جسارت نیوز) میزبان انگلینڈ اور نیوزی لینڈ کی ٹیموں کے درمیان12ویں آئی سی سی ورلڈ کپ کرکٹ ٹورنامنٹ 2019ء کا فائنل میچ اتوار کولارڈز میں کھیلا جائے گا۔ میچ پاکستان کے معیاری وقت کے مطابق دوپہر 2 بجکر 30 منٹ پر شروع ہوگا۔ انگلش ٹیم چوتھی مرتبہ اور کیوی ٹیم دوسری مرتبہ میگا ٹورنامنٹ کا فائنل کھیلنے کا اعزاز حاصل کرے گی۔ انگلش ٹیم اس سے قبل 1979ء، 1987ء اور 1992ء میں منعقدہ ورلڈ کپ ٹورنامنٹس کا فائنل کھیل چکی ہے جبکہ کیوی ٹیم نے 2015ء میں پہلی مرتبہ ورلڈ کپ فائنل کھیلا تھا۔ انگلینڈ میں ورلڈ کپ ٹورنامنٹ اختتامی مرحلے میں داخل ہو گیا ہے اور 2ٹاپ ٹیموں انگلینڈ اور نیوزی لینڈ نے فیصلہ کن معرکے میں جگہ بنا رکھی ہے۔ میگا ایونٹ کے پہلے سیمی فائنل میچ میں نیوزی لینڈ نے بھارت کو 18 رنز سے شکست دیکر فائنل کے لئے کوالیفائی کیا جبکہ دوسرے سیمی فائنل میچ میں انگلینڈ نے دفاعی اور عالمی چیمپئن آسٹریلیا کو 8 وکٹوں سے ہرا کر کرکٹ کی تاریخ میں چوتھی مرتبہ فائنل کھیلنے کا اعزاز حاصل کیا۔ انگلینڈ اور نیوزی لینڈ کے درمیان فائنل کل لارڈز کے تاریخی گرائونڈ پر کھیلا جائے گا۔ دونوں ٹیمیں اب تک عالمی ٹائٹل جیتنے سے محروم ہیں اسلئے دونوں ٹیمیں تاریخ رقم کرنے کیلئے خوب جان لڑائیں گی۔ دونوں ٹیموں کے کپتانوں نے میگا ایونٹ کا ٹائٹل جیتنے کے لئے بیانات دیئے ہیں۔ انگلش ٹیم کو ہوم گرائونڈ اور کرائوڈ کا ایڈونٹیج حاصل ہو گا اسلئے عالمی ٹائٹل کیلئے اسے فیورٹ قرار دیا جا رہا ہے تاہم دوسری جانب کیوی ٹیم نے جس طرح سیمی فائنل میں بھارت کو قابو کیا اس کے بعد وہ بھی ٹائٹل کیلئے مضبوط امیدوار بن چکی ہے اسلئے ماہرین کرکٹ نے دونوں ٹیموں کے درمیان کانٹے دار مقابلے کی توقع ظاہر کی ہے۔ واضح رہے کہ آئی سی سی ورلڈ کپ ٹورنامنٹس کی تاریخ میں آسٹریلوی ٹیم 5 مرتبہ عالمی ٹائٹل جیت کر سب سے کامیاب ترین ٹیم ہے۔ ویسٹ انڈیز اور بھارت کی ٹیمیں 2,2 مرتبہ عالمی ٹائٹل جیتنے کا اعزاز حاصل کر چکی ہیں جبکہ پاکستان اور سری لنکا کو ایک، ایک مرتبہ عالمی ٹائٹل جیتنے کا اعزاز حاصل ہے۔ اگر انگلینڈ جیت گیا تو کئی برس قبل چھوڑے گئے شوشے کی تکمیل ہو جائے گی جس میں بھارت آسٹریلیا اور انگلینڈ کو بڑی ٹیموں کے طور پر پیش کیا گیا تھا ۔2011ء میں بھارت،2015ء میں آسٹریلیا چیمپئن بنا ، اب انگلینڈ میں فائنل ہے اور انگلینڈ کے لیے جس طرح راستے ہموار کیے گئے ہیں اس سے لگتا ہے کہ بگ تھری کا حلقہ مکمل ہونے کو ہے اور تینوں ملک باری باری چیمئن بنیں گے ۔
