مسلم لیگ (ن) کے صدر شہباز شریف کا کہنا ہے کہ عمران نیازی کا پاکستان کو لاک ڈاؤن کرنے کا دیرینہ خواب آج آخر پورا ہوگیا، آج پورا ملک بند پڑا ہے۔۔
اپوزیشن لیڈر شہباز شریف نے تاجروں کی ملک گیر ہڑتال پرردعمل کا اظہار کرتے ہوئے کہا کہ ملک بھر کے تاجروں اور غریب عوام کے ساتھ ہیں،ملک پر مسلط مینڈیٹ چور حکمرانوں نے ملک و قوم کو آئی ایم ایف کو بیچ دیا۔
شہباز شریف نے کہا کہ عمران نیازی کا پاکستان کو لاک ڈاؤن کرنے کا دیرینہ خواب آخر پورا ہوگیا،آج پوراملک بند پڑا ہے۔ انہوں نے کہا کہ مکان، دکان اور کارخانے بند کرنے والے حکمرانوں کی سوچ ‘مار دیں گے، گرا دیں گے، بند کر دیں گے سے آگے نہیں جاتی۔
سابق وزیراعلی پنجاب نے کہا کہ بے گناہ اور مظلوم سیاسی قیدی نواز شریف کے ساتھ ظلم کا نتیجہ قوم بھگت رہی ہے،نواز شریف نے قوم کو مہنگائی، لوڈ شیڈنگ، بدامنی سے نجات دلائی،بجلی،سڑک، روزگار، وقاراور امن و امان دیا۔نواز شریف کے دور میں ملک 5.8 فیصد شرح سے ترقی کر رہا تھا، دشمنوں کو تکلیف ہوئی کہ نوازشریف پاکستان کو ترقی کیوں دے رہا ہے؟۔
انہوں نے کہاکہ مخالفوں کو تکلیف ہوئی کہ 47 سال میں مہنگائی کی شرح تین فیصد پر کیسے آگئی؟،پاکستان کے ریونیو میں اضافہ کیسے ہو گیا؟،پاکستان نے آئی ایم ایف سے کیسے جان چھڑا لی؟،چین نے پاکستان میں میں 60 ارب کی سرمایہ کاری کیوں کی؟ ۔
شہبازشریف نے کہاکہ بے گناہ نوازشریف کے ساتھ روا ظلم ختم کرنا ہوگا،پاکستان اور اس کے عوام کے مفادات کا تحفظ نواز شریف کرسکتا ہے ۔ انہوں نے کہاکہ قوم کے صبر کا مزید امتحان نہ لیا جائے، نواز شریف کو رہا کیا جائے۔
