گورنر اسٹیٹ بینک رضا باقر نے کہا ہے کہ فنانشل ایکشن ٹاسک فورس کی شرائط کی وجہ سے پاکستان کا آئی ایم ایف کے ساتھ کیا گیا پروگرام خطرے میں ہے۔
تفصیلات کے مطابق منگل کو کراچی میں گورنر اسٹیٹ بینک رضا باقر نے اسٹیٹ بینک میں کراچی کے سٹاک مارکیٹ کے رہنماﺅں ک اجلاس اپنے دفتر میں طلب کیا تھا۔ اس موقع پر کراچی سٹاک ایکسچینج اور ڈالر کی قیمت پر میٹنگ میں تبادلہ خیال ہوا جبکہ سٹاک ایکسچینج میں کاروباری سطح پر بہتری کے حوالے سے تجاویز پر غور کیا گیا۔
میٹنگ میں گورنراسٹیٹ بینک سید رضاباقر نے اسٹاک مارکیٹ کے نمائندوں سے خطاب کرتے ہوئے کہا کہ فنانشل ایکشن ٹاسک فورس کے شرائط کی وجہ سے پاکستان کا آئی ایم ایف کے ساتھ کیا گیا قرضے کا پروگرام خطرے میں ہے، اگر پاکستان کی جانب سے ایف اے ٹی ایف کے شرائط پورے نہ کئے گئے تو پروگرام معطل ہو سکتا ہے۔
انہوں نے کہا کہ ایف اے ٹی ایف کی شرائط کو پوری کرنے کےلئے ٹیم قائم کردی گئی ہے جبکہ اس حوالے سے ایف اے ٹی ایف پر سیاستدانوں کے ذریعے رکن ملکوں سے رابطہ بھی کیا گیا ہے۔
