سکھر (نمائندہ جسارت) بیگم نصرت بھٹو ائر پورٹ سکھر کے منیجر کے اعلامیے کے مطابق سکھر ائر پورٹ سے پہلی حج پرواز آج شام 3 بج کر 55 منٹ پر جدہ وایہ کراچی روانہ ہوگی، جس میں 168 عازمین حج روانہ ہوں گے۔ عازمین حج کو خدا حافظ کہنے کے لیے ایک تقریب منعقد کی گئی ہے، جس کے مہمان خصوصی وفاقی وزیر برائے نجکاری محمد میاں سومرو ہوں گے۔ وفاقی وزیر عازمین حج کو الوادع کریں گے۔ اعلامیے کے مطابق بیگم نصرت بھٹو ائر پورٹ سے مجموعی طور پر 11 پروزایں روانہ ہوں گی۔ شیڈول کے مطابق سکھر ائر پورٹ سے دوسری حج پرواز 6 جولائی کو، تیسری 12 جولائی کو، چوتھی اور پانچویں پرواز 13 جولائی، چھٹی پرواز 14 جولائی کو، ساتویں پرواز 16 جولائی کو، آٹھویں پرواز 19 جولائی، نویں پرواز 21 جولائی کو، دسویں پرواز 23 جولائی کو جبکہ 11 ویں اور آخری پرواز سکھر ائر پورٹ سے 25 جولائی 2019ء کو روانہ ہوگی۔
